Dakota Bible Home

Dakota Wowapi Wakan, JUDAS (Jude)

_________________________

JUDAS (Jude)

Tawowapi Kin.

1 Judas, Jesus Messiya tawowidake kin, qa Jakob sunkaku kin, tona Wakantanka Ateyapi kin en wicayuecepidan, qa Jesus Messiya en wicakpatanpi, qa wicakicopi kin hena wowapi wicakicaga.

2 Wowaonšida, qa wookiye, wacantkiyapi ko niyepi en niciyuotapi nunwe.

3 Waštecicidapi kin, wiconi ptaya unhapi kin on aiciciya wowapi cicagapi eca, wowacinye ehanna wicašta wakan wicaqupi qon he nina yakitanpi kta e on wowapi cicagapi, qa wahokonciciyapi kta iyececa.

4 Wicašta wanjikši naĥmana en opapi, wanakajatanhan woyaco kin de on owicawapi; hena Taku Wakan iyececapi šni, qa Wakantanka unkitawapi towaonšida kin he wicowicaštašni kagapi, qa Wakantanka ecedan Itancan kin he anaĥmanpi, qa nakun Jesus Messiya Itancan unyanpi kin.

5 Heon etanhan, taku, ehanna sdonyayapi ešta, he ake kiksuyeciciyapi kta wacin, Itancan kin oyate kin Egupta etanhan ehdaku, qa iyohakam tona wicadapi šni kin hena ihangwicaye cin.

6 Qa nakun maĥpiya ohnihde otokahe unpi kin kpatanpi šni, tuka iye tipi eĥpekiyapi qon, hena otpaza ihukuya, owihanke wanin mazaicicaĥiĥa kin on, anpetu tanka woyaco kin he en awicayuha.

7 Sodom qa Gomorra iyececa, qa otonwe hena ihdukšan wanke cin, hena iš eya iyecen wiinaĥmanpi kin en icicupi, qa wicaceĥpi toktokeca akitapi ece qon hena e woonspe on ehdepi, qa peta owihanke wanica on wošitkihda en unpi.

8 He iyececa, wihamnanpi sa kin dena wicaceĥpi kin ašamyapi, qa wokiconze waĥtedapi šni, qa taku tanka yašicapi ece.

9 Hececa, tuka Mikael maĥpiya ohnihde itancan kin he wakanšica kin kici econ, qa Moses tancan kin on akinicapi qehan, wooštehda woiyaonpe wan en aya tawatenye šni, tuka, Itancan kin iyopeniyan nunwe, eciya.

10 Tuka dena e qe taku sdonyapi šni kin hena yašicapi ece: tuka iye icagapi kin eciyatanhan taku sdonyapi kin hena on ihdušicapi, woteca ia okitpanipi kin iyececa.

11 Woteĥi wicakiciun nunwe; Qain tancanku kin ohna yapi, qa wokajuju on, Balaam tawohnaye kin nina ainyankapi, qa Kore wicakipajin qon en ihangiciyapi.

12 Hena woašape kin heca, wacantkiya wayatapi kin en opeya wotapi, qa wikopešniyan cemiciyapi: maĥpiya šapa mini wanica tate on ayapi ece kin; can kin ptanyetu eca šeca aya, waskuyeca codan, inonpa šeca, qa hute eciyatanhan yujunpi kin hena hececapi.

13 Miniwanca taja ohitika, iye wowištece tawapi kin minitaga iyecen hiyuyapi ece; wicanĥpi onuniyata unpi, on otpaza sape ĥinca owihanke wanin wicakicihnakapi.

14 Henok Adam etanhan wicašta išakowin qon he itokam hena owicayake ca heya; Wanyaka po, Itancan kin wicašta wašte wicayuhe cin woyawa tanka om u ce;

15 Owasin wicayaco kta, qa tona Taku Wakan ohodašni kin hena wicoĥan šikšica owasin ohodašniyan econpi qon hena sdonkiyewicaye kta, qa wicoie canksiksi owasin waĥtanipi sa Taku Wakan ohodapi šni oie kicatonpi ece qon hena nakun.

16 Hena e wihnupi sa, wawiyaonpapi sa, iye cantiheyapi kin eciyatanhan manipi ece; qa i eciyatanhan waĥanĥanicidaya iapi, qa taku on etanhan wicašta itohnake kin waštedakapi ece.

17 Tuka waštecicidapi kin, niyepi, Jesus Messiya Itancan un yanpi yewicaši qon hena oiepi ehanna oyakapi qon hena kiksuya po;

18 Anpetu ihankeya kin en wicašta wawiĥaĥapi kin yuke kta, iye cantiheyapi šice cin eciyatanhan manipi kin, he oniciyakapi qon.

19 Ihdutokanpi kin dena eepi, witantanpi, qa Woniya kin yuhapi šni.

20 Tuka waštecicidapi kin, niš niyepi wowacinye iyotan wakan nitawapi kin he ohna icaĥiciyapi, qa Woniya Wakan kin eciyatanhan wocekiye eya po;

21 Wakantanka waštedakapi kin en ihduha po; qa Jesus Messiya Itancan unyanpi towaonšida wiconi owihanke wanica iyahde kte cin he ape yukan po.

22 Unkan hunĥ wicayukcanyan onšiwicada po;

23 Qa hunĥ iš wokokipe on niwicaya po, peta etanhan iwicacupi kin iyececa; qa wokoyake wicaceĥpi on ašapapi kin hena ee kaeš šicedaka po.

24 Unkan tuwe woaĥtani econ šni niyuhapi kta okihi, qa wowiyuškin yuha iye towitan kin en iyaonpepica šni enihdepi kte cin,

25 Wakantanka ecedan ksapa, Wanikiya unkitawapi kin hee, Jesus Messiya Itancan unyanpi kin eciyatanhan, wowitan, woyaonihan, wookihi qa wokiconze, dehantu qa wicoicage owasin hehanyan, tawa nunwe. Amen.

_________________________


Dakota Bible Home