Dakota Bible Home

Dakota Wowapi Wakan, Inyan Inonpa (II Peter)

_________________________

INYAN INONPA (II Peter)

Tawowapi Inonpa Kin.

WICOWOYAKE 1.

1 Simon Inyan, Jesus Messiya tawowidake qa yeši qon he, tona Wakantanka unkitawapi toowotanna kin on, qa Jesus Messiya Wanikiye cin eciyatanhan, unkiye unhapi kin iyecen wowacinye teĥika yuhapi kin hena wowapi wicakicaga.

2 Wowaonšida, wookiye ko, Wakantanka sdonyapi kin en, qa Jesus Itancan unkiyapi kin on niciyuotapi nunwe.

3 Iye towašake wakan kin he taku on wiconi qa woohodapi kte cin owasin unqupi kin he iyececa, tuwe wowitan qa wookihi on unkicopi kin he sdonyapi kin eciyatanhan.

4 Hena on taku tanka ĥinca, qa taku teĥike ĥinca iwahounyanpi; hecen hena on Taku Wakan ouncage kin en oyapapi kta, wiconi kin de en wocantiheye šica on wicošice nayecipapi kin.

5 Qa nakun he on nina mniheiciya po, wacinyayapi kin en waditakapi kin ikoyagya po; qa waditakapi kin en wosdonye;

6 Qa wosdonye kin en iyatahdeiciyapi šni; qa iyatahdeiciyapi šni kin en wacintankapi; qa wacintankapi kin en taku wakan iyececapi;

7 Qa taku wakan iyececapi kin en waštekicidapi; qa waštekicidapi kin en wacantkiyapi ikoyagya po.

8 Hena taku kin en niunpi qa niciyuotapi kinhan, Jesus Messiya Itancan unkiyapi sdonyapi kin en taku icaĥye ca waskuyeca aicage cin henicapi kta e nicagapi.

9 Tuka tuwe dena yuhe šni kinhan, he ištagonge ca tehan wawanyaka okihi šni, qa waĥtani qon hena kipakintapi kin he akiktonja.

10 Heon etanhan, mihunkawanji, nicopi qa nicaĥnigapi kin aiciciya hdusuta po; hena hecen ecanonpi kinhan icimana nihinĥpayapi kte šni.

11 Qa nakun heon Jesus Messiya Itancan qa Wanikiya unkitawapi tokiconze owihanke wanice cin en yaipi kte cin wijinya nicupi kta.

12 Heon etanhan taku hececa ohinniyan kiksuyeciciyapi kta awektonje kte šni, hena niye ĥinca sdonyayapi, qa nakaha wowicake kin de en sutaya nihdepi ešta.

13 Tohanyan wakeya kin de ohna waun kin hehanyan kiksuyeciciyapi kin on iyocipaštakapi kte cin he hecetu wadake:

14 Wakeya mitawa kin de aškadan wehnake kta sdonwakiya, Jesus Messiya Itancan unkiyapi omakiyake ciqon iyececa.

15 Tuka nakun detanhan imdamde cin iyohakam, taku kin dena ohinniyan yeksuya oyakihipi kta e awakite kta.

16 Jesus Messiya Itancan unkiyapi towašake qa hi kte cin hena unkoniciyakapi qehan, hitunkakanpi ksamya kagapi kin unkunpi šni, tuka iye tanka ĥince cin he išta on wanunyakapi.

17 Wakantanka Ateye cin eciyatanhan woyuonihan wowitan ko icu, wowitan wašte kin etanhan wicaho kin de hiyu qehan, Micinkši waštewakidake cin he dee, on iyomakipi ĥinca ce.

18 Unkan wicaho kin he maĥpiya eciyatanhan u kin he naunĥonpi, paha wakan kin akan kici unyakonpi qehan.

19 Tuka wokcanpi oie iyotan suta wan unhapi; he qe anayagoptanpi kinhan tanyan ecanonpi kta, petijanjan tukten otpaze cin en ijanjan kin iyececa, nicantepi kin ekta anpao kamdeze ca, en anpao wicanĥpi kin hinanpe kte cin hehanyan.

20 Qa de tokaheya sdonya po, wowapi wakan kin en wokcanpi kin owasin tuwedan iye cinka oyake šni.

21 Wokcanpi kin wanakajatanhan wicašta tawacin kin eciyatanhan u šni; tuka wicašta wakan Wakantanka tawa Woniya Wakan kin token iewicakiye ciqon hena hecen eyapi ece.

WICOWOYAKE 2.

1 Tuka he ehan oyate kin ehna wicašta wokcan itonpi šni yukan qon, he iyecen niyepi kin ehna waonspekiya itonpi šni kin heca yuke kta, naĥmana wohnuni woihangye kin en aupi kta, Itancan opewicakiton qon he eĥpeyapi, qa wicotakunišni oĥanko amnaiciyapi kta.

2 Qa wicoĥan šica econpi kin en wicota opapi kta; hena on wowicake canku kin yašicapi ece e kta.

3 Qa waicu wacinpi kin eciyatanhan wicoie skuya on wiyopeniyanpi kta; hena e wicayacopi kin wanakajatanhan en awicau, qa ihangwicayapi kte cin he ĥba šni.

4 Wakantanka maĥpiya ohnihde waĥtanipi qon hena wicakpatan šni, tuka wakanšica ti kin ekta iyayewicaya, qa woyaco kte cin hehanyan wicayuhapi kta e otpaza maza icicaĥiĥa on wicakaška hecinhan;

5 Qa maka tannike cin kpatan šni, tuka Nowa wicašta wicišahdogan wicoowotanna oyake cin he kpatan, qa wicoicage waĥtanipi sa amnitanwicaya;

6 Qa Sodom qa Gomorra otonwe kin caĥota kaĥya eĥpewicaye, woihangye on wicayaco, qa tona tokata waĥtani sa unpi kte cin hena woonspe wicakicaga;

7 Qa Lot owotanna un, wicašta waĥtepi šni oĥan šicapi kin wacin iyowicakišica ece kin he ehdaku:

8 Wicašta owotanna kin he hena wicehna ti, qa taku wanyake ca naĥon kin on, anpetu eca iye nagi owotanna ekta wacin iyowicakišica ece, šicaya oĥanyanpi kin on:

9 Itancan kin wicašta wašte wowiyutanye kin etanhan token ewicahdaku kta sdonya, qa nakun wicašta owotanna šni kin woyaco anpetu kin hehanyan wicayuhe kta, šitkihdawicayapi kta e heon:

10 Tuka tona woašamye cantiheyapi kin en wicaceĥpi eciyatanhan manipi, qa wokiconze waĥtedapi šni kin hena iyotan: hena waĥanicidapi qa wamnaicidapi ece; qa tona tankapi kin wicayašicapi kokipapi šni.

11 Maĥpiya ohnihde kin, wookihi qa wowašake on iyotanpi qeyaš, Itancan kin itokam wayašicapi woyaco kin en awicayapi šni ece.

12 Tuka dena iš, woteca iyececa, wicayuzapi qa ihangwicayapi kta e on wicakagapi kin, taku okaĥnigapi šni keš he yašicapi ece; qa wicotakunišni tawapi kin en ihangiciyapi kta;

13 Qa anpetu icunhan tanyan wotapi kin he woiyokipi dakapi kin heon woaĥtani iyunwin kin icupi kta. Hena om wayatapi icunhan wohnayeiciyapi kin on iyuškinpi, woašape qa taku samya wanke cin hecapi;

14 Išta yukanpi wiinaĥmanpi kin on ojudan qa woaĥtani ayuštanpica šni; wicanagi kacegya unpi kin hena wicahnayanpi ece; cante wawicakipi e ecewakta kin heca yuhapi, wicotakunišni cincapi kin:

15 Canku owotanna kin ayuštanpi, qa onuniyata unpi, Balaam Bosor cinhintku woaĥtani iyunwin waštedake ciqon he tacanku kin en opapi:

16 Iye taku šica econ qon on iyopeyapi; šonšonna kin ia okitpani ece wicaho on ie ca, wicašta wokcan witkotkoya oĥanye cin he kišica.

17 Miniyowe mini wanica, maĥpiya šapa tate iyumni on toke cincin eyaye cin hena hecapi; hena on otpaza sape ĥinca owihanke wanica wicakicihnakapi.

18 Waĥanĥanicidaya takušnišni eyapi eca, wicaceĥpi cantiheyapi kin eciyatanhan, witkoya oĥanyanpi kin on, tona wohnaye en ounyanpi kin kitan ecinyan nawicakicipapi qon hena iyakapewicayapi ece.

19 Tawaiciyapi kin wicaqupi kta keyapi, tuka iyepi kaeš wicotakunišni iwicadaka. Taku on tuwe iyakapeyapi kinhan, he on wowidagyapi ece.

20 Itancan qa Wanikiya Jesus Messiya sdonyapi kin eciyatanhan, wicoicage kin de en woašape kin nakipapi ešta, ake hena on iyakapeyapi qa en ihdaškapi kinhan, hena otokahe ekta wašte qa owihankepi kin he šica ece.

21 Woowotanna canku kin he sdonyapi šni unkanš he wašte kta tuka, qa he sdonyapi qa woahope wakan wicaqupi kin ayuštanpi kin he šice ĥinca.

22 Tuka wiyacinpi eyapi wicakapi kin he iyecen waakipapi; Šunka taku hiyuye cin he ake hduta ce; qa, Kukuše yujajapi qon he ake upšija en iwanka ce.

WICOWOYAKE 3.

1 Waštecicidapi kin, de nakaha wowapi inonpa cicagapi; hena en nitawacinpi mdesahan kiksuyapi on iyocipaštakapi.

2 Hecen wicašta wokcan wakan token oieyapi qon, qa nakun unkiye Itancan qa Wanikiya yeunšipi qon token econ unnišipi kin hena yeksuyapi kta.

3 Qa de tokaheya sdonya po, anpetu ehake kin en waiĥaĥapi, iye cantiheyapi šica eciyatanhan manipi kin heca hipi kta;

4 Qa heyapi kta; Hi kta keyapi qon he tukte e he; wicahunkake ištinma iĥpayapi ehantanhan otokaheya tanhan taku owasin tokeca šni wanka ce.

5 Tuka he de sdonyapi šni, Wakantanka oie kin eciyatanhan maĥpiya kin ehanna un, qa maka kin mini mahen qa nakun mini akan han;

6 Qa nakun he eciyatanhan, maka ehanna un qon he mini apašbog hiyaye ca ihangya.

7 Tuka maĥpiya qa maka nakaha un kin hena iye oie kin on kihnakapi, peta on ayuhapi, woyaco anpetu qa wicašta šica šitkihdawicayapi kte cin hehantu.

8 Tuka, waštecicidapi kin, he de sdonye šni yukanpi šni po, Itancan kin ekta anpetu wanjidan waniyetu kektopawinge iyececa, qa waniyetu kektopawinge anpetu wanjidan iyececa ece.

9 Itancan kin taku wahowicaye cin yutehan šni, wicašta wanjikši yutehanpi eyapi kin iyececa; tuka unkiyepi on wawacinkta yuza tanka, tuwedan awihnuniiciye kte šni, tuka owasin woiyopeiciye en ihdoupi kta cin.

10 Tuka Itancan taanpetu kin wamanon sa wan hanyen hi ece kin he iyecen u kta, hehan maĥpiya kin ĥmunĥmunyan hinhda on tokan iyaye kta, qa taku kin peta ĥinca on skan kta; qa maka kin wicoĥan ohna un kin hena ĥuĥnage kta.

11 Hena taku kin owasin hecen skan kta hecinhan, wicoĥan wašte qa Taku Wakan iyececapi kin en taku wicašta yaunpi kta iyececa he:

12 Wakantanka taanpetu u kte cin he ayapepi qa on inayaĥnipi kta; he en maĥpiya kin aide ecen atakuni kte šni, qa taku kin peta tanka ĥinca on skan kta.

13 Hececa ešta, unkiye, iye wahounyanpi kin eciyatanhan, maĥpiya teca qa maka teca en woowotanna ounye cin he wanunyakapi kta e unkapepi.

14 Heon etanhan, waštecicidapi kin, taku hececa ayapepi kin heon aiciciya po, hecen iye wookiye en ašape šni qa iyaonpepicašni iyeniyanpi kta.

15 Qa Itancan wawacinkta yuza tanka kin he wiconi kecankin po; Palos, hunkawanjinunyanpi wašte kin, iš eya woksape qupi kin eciyatanhan, wowapi nicagapi kin iyececa;

16 He wowapi kage cin owasin en taku hececa cajeyata ece; hena wanjikši okaĥniĥ teĥika, tona onspepi šni qa kaktihanhan unpi kin yatokecapi, wowapi unma kin iyececa, iye ihdutakunipi kte šni heon.

17 Heon etanhan, waštecicidapi kin, niš niyepi hena itokani sdonyayapi, heon ihnuhan wicašta šica wohnaye kagapi kin nihnayanpi, qa sutaya nihdepi kin etanhan nihinĥpayapi kinhan.

18 Tuka wowašte kin en, qa nakun Itancan unyanpi Wanikiya Jesus Messiya sdonyapi kin en icaga po. Iye kin wowitan nakaha qa owihanke wanica kiciun nunwe. Amen.

_________________________


Dakota Bible Home